جووول

مرتضى وشوبير....كلاكيت عاشر مرة ...تقريبا

انا بصراحة مش عارف اكتب ايه....ايوة مش عارف....الموضوع بقى بايخ اوى اوى اوى....وزاد عن حده...وكل شوية نسمع حاجة جديدة عنه..تلاقى مرتضى منصور طالع يقولك...شوبير ده انسان مش عارف ايه...وانا معايا ليه ورق يدينه....يروح جاى شوبير بمنتهى اللطافة طالع ف البرنامج بتاعه قايل ليه كلمتين...بمنتهى الذوق ...ويقولك اصل ياجماعة فى واحد كده مش عارف ماله بيقول كلام كده هو مش قده...طب نعم؟؟؟..واخرتها؟؟؟..الموضوع بقى مش لطيف بالمرة....والاتنين أصبحو يمثلو مصدر زهق للجمهور....والسب والقذف بقى علنى وعينى عينك على الهواء مباشرة وقدام الجمهور....كتير اوى

الحكاية بدأت من واحدة صحفية راحت وصلت مكالمة حصلت بينها وبين أحمد شوبير على مرتضى منصور....طبعا المكالمة كانت قذرة بكل معانى الكلمة وفيها تجاوزات كتيرة اوى اوى....مش عارف الصحفية دى كانت عاوزة توصل لأيه من نشرها للمكالمة دى ...المهم

من هنا بدأت الحرب بقى علنية بين مرتضى وشوبير ....شوبير يروح يهاجم مرتضى على البرنامج بتاعه بشياكة....يروح مرتضى طالع وبدون اي ذوق يطلع يقول كلام مش عاوز اقول صريح...دى الصراحة اللى بتقتل

لغاية المشكلة ما تتطورت بشكل رهيب الفترة اللى فاتت دى ودخلت القضاء بقى....مرتضى منصور قدر انه يمنع برنامج شوبير من على قناة الحياة ..ووزير الاعلام وجه انذار للقناة بعدم اذاعة برنامج شوبير...بجد الموضوع زاد عن حده فعلا...دلوقتى المواجهات بينهم اصبحت كلها سب وقذف بينهم وبين بعض....فى برنامج محمد شبانة اللى بيجى على قناة مودرن سبورت ...دكتوروليد دعبس صاحب القناة فكر انه يعمل صلح بينهم...استضاف كابتن شوبير..وادخل اتصال مع الاستاذ مرتضى منصور

مرتضى منصور سلم على كابتن شبانة والدكتور وليد...ولم يسلم على كابتن شوبير !!!!!!!!!...مش هى دى المشكلة ...المشكلة فى اللى جاى بقى...الاستاذ مرتضى جاب معلومات وكلام عن كابتن شوبير غريب...رقم البطاقة بتاعته ..عنوانه الاصلى...مهنته...حاجات ملهاش اي علاقة بالبرنامج اصلا....المهم بعد ماكابتن شوبير سمع الكلام ده راح سايب البرنامج وقايم ماشى !!!!!!!!!...ايه ده ؟؟؟؟؟....ده كلام !!!!...الموضوع لم ينتهى عند النقطة دى ..لأ...ده كابتن مدحت شلبى استضاف الاستاذ مرتضى منصور فى قناة مودرن ....وعاوز اقول ليكو لمدة ساعة ونصف الاستاذ مرتضى منصور بيتكلم عن كابتن شوبير!!!!!!!!!!....ساعة ونصف تخيلو؟؟؟؟....المشكلة والله اللى مضايقانى هو الجمهور....احنا زهقنا والله....كل يوم تلاقى خبرجديد عن المشكلة....طب هتنتهى على ايه المشكلة دى انا مش عارف....بس بينى وبينكو...الاتنين يستاهلو....بحس انهم نفس العينة مش عارف ليه....عموما ربنا يهدى... ومانجيش فى العدد اللى جاى نقول كلاكيت للمرة الخمسين!!!!!

***************************

مصرvs. انجلترا...مستفيدين مستفيدين

بلا ادنى شك...وبيقين تام ان منتخبنا القومى قد استفاد استفادة عظيمة من هذه المباراة...بصرف النظر عن الهزيمة التى ارى من وجهة نظرى انها جاءت بأخطاء من جانبنا....الا انها انتصار كبير لمنتخبنا القومى..لماذا؟؟؟؟

اولا الجماهير الاوروبية لاتعرف عن منتخبنا الا القليل ..بالرغم من حصولنا على كأس افريقيا ثلاث مرات متتالية...حيث ان متابعتهم لهذه البطولة قليلة وغير كافية لمعرفتنا عن قرب....ولكن بعد الاداء المشرف الذى قدمناه فى المباراة الاخيرة اعطى انطباع جيد لفريقنا امام العالم...حيث ان هذه المباراة كانت تبث لدول كثيرة....

اداءنا فى الشوط الاول كان فى غاية الجمال...لاننا اردنا ان نثبت للعالم اننا كنا الاحق والاجدر بالصعود لكاس العالم...اردنا ان نثبت بان عدم صعودنا لكأس العالم ليس معناه اننا فريق غير قادر على المنافسة...وقد اثبتنا ذلك خلال الشوط الاول ...ولكن....كعادة فرقنا العربية...يأتى الشوط الثانى مغاير تماما لما حدث فى الشوط الاول...الاداء يتراجع....اللياقة البدنية تقل...يبدأ الفريق المنافس بالضغط علينا...ومن ثم احراز اهداف سهلة فى مرمانا....ولكن ليست هذه المشكلة...ليست المشكلة فى الهزيمة...المشكلة فى كم الاستفادة الذى حققناه من هذه المباراة...

حيث بدأت الاندية الانجليزية بالنظر الى اللاعبين المصريين مرة اخرى واخذ انطباع جيد عنهم..على سبيل المثال اللاعب حسام غالى...حيث قرأت فى احدى المواقع ان موقع انجليزى شهير اقرت جماهيره عن حسرتها على ترك نجمها حسام غالى بعد مشكلة القاءه لفانلة فريقه توتنهام هوتسبير...اتذكر جيدا حسام غالى عندما كان يلعب فى هذا الفريق...كان متألقا لدرجة كبيرة وكان ياخذ مكانا اساسيا فى تشكيلة فريقه ..واتذكر ايضا انه كثيرا ماكان يأخذ رجل المباراة فى بعض المبارايات التى كان يلعبها فريقه...

وبدأت ايضا الاقاويل عن تقديم عرض مغرى من الارسنال ومانشستر يونايتد الى اللاعب المتألق حاليا محمد زيدان....اللاعب الذى احرز هدف المباراة الوحيد للمنتخب

ايضا الأقاويل عن تقديم عروض الى اللاعب احمد المحمدى مرة اخرى بعد ماكان قد قدم نادى سندرلاند عرضا لشراءه من نادى انبى ...ولكن رفض نادى انبى لضعف المقابل المادى...على حد قولهم...

وأرى ايضا من وجهة نظرى المتواضعة ان هذه المباراة اعطت لنا الثقة فى انفسنا فى قدراتنا على مواجهة الكبار...وعدم الخوف من اي فريق مهما كان حجمه...حيث جميعا نعرف لاعبين المنتخب الانجليزى جيدا امثال لامبارد ..جيرارد...تيرى...والكوت....لاعبين باحجام كبيرة ويلعبون فى اقوى فرق اوروبا وانجلترا...ونقدم امامهم هذا الاداء...يعتبر انجاز فى حد ذاته بالنسبة لنا ...

كنت دائما اتمنى ان نواجه فرق كبيرة فى حجم انجلترا ..اسبانيا...فرنسا...المانيا....على اراضى هذه المنتخبات...وليس على ارضنا...حيث ان ذلك سوف يعطينا الثقة فى انفسنا والتعود على مواجهة هذه الدول فى اي مناسبة....

ما اتمناه من الاتحاد المصرى ان يكرر تجربة انجلترا مرة اخرى مع دول اخرى...لتكرار الاستفادة وتشهير لاعبينا خارجيا ...لعل وعسى ان يحترف لاعبونا فى الخارج كي نراهم يلعبون فى افضل اندية العالم..لما لا ؟؟؟؟

***************************

كلام بالمصرى

الاتحاد المصرى: نفسى اعرف هو الاتحاد سمح ازاى لاعضاءه انهم ياخدو ازواجهم معاهم انجلترا عشان الماتش....يمكن هيشجعو مثلا؟؟؟؟؟؟؟؟؟؟

مرتضى منصور: انت بلا ادنى شك محامى ملوش حل...بس الادب فضلوه عن اي حاجة تانية ..ولا انت شايف ايه يا استاذنا ؟؟؟؟

شوبير: بسأل نفسى كتيرهو انت اللى بيعملو فيك الاستاذ مرتضى ده ليه....بس تصدق انا عرفت الاجابة الفترة اللى فاتت...مبقاش حد وراك يا جميل .

حسام البدرى: اداء الاهلى عجبنى اوى منك بعد ما ماشى جوزيه...حاسس ان الاهلى اتغير لعبه وبقى لعب سريع...بس انا حاسس ان فى حاجة ناقصة فى الفريق ..ولا ايه ؟؟؟؟؟؟

حسام حسن: بشكرك انك رجعت لجماهير الزملكاوية البسمة ليها من جديد....بس ياريت تستمر على كده انا خايف تعمل زى ماحصل فى المصرى !!!!

ميدو: من زمان وانا مكنتش اعرف محترف مصرى غيرك...بس انت ضيعت نفسك ..ده انت كنت اساسى على دروجبا وابراهيموفيتش والناس دى ..فاكر ولا لا ؟؟؟؟؟؟؟؟

عمرو زكى: الله يخليك تبطل تطرف نفسك على اجناب الملعب...ياعمرو انت مكانك جوه الصندوق...ولا انت شايف حاجة تانية ؟؟؟؟

محمد زيدان: نفسى اشوفك فى الدورى الانجليزى....حاسس ان ده مكانك بجد...دى فترة تألقك بجد..ماشاء الله عليك ...

جدووو: اتمنى انك تقبل عرض ليون اللى جه ليك ده...الفريق بيصعد دايما لدورى ابطال اوروبا...ومش مهم المقابل المادى ..بلاش تفكر فيه.

حسن شحاتة: مش عارف والله انت اللى عملته مع ميدو ده صح ولا غلط...بس ساعات بقول انت صح.وف نفس الوقت بقول كفاية كده هو اتعلم ...

ابو تريكة: الواحد مفتقدك بشدة عشان يشوف تأثيرك تانى على الفريق ..سواء المنتخب او الاهلى...مشتاقين نشوفك يا ماجيك..

حازم امام (الزمالك): انت لسة صغير عشان تزعل وتقول انا مش بنزل ليه...لسة بدرى اوى على الكلام ده ياحازم...الصبر جميل...

احمد عيد عبد الملك: نفسى تلعب كل ماتشاتك بشكل واحد...ماتش حلو وماتش وحش وماتش نص نص دى مش شكل لاعب فى المنتخب ابدا...

دودى الجباس: حمدلله على السلامة يا جباس..رجعت لليرس عشان نشوفك تانى...ويلا حاولو تصعدو بقى عشان نتابعكو بجد ..

عماد متعب: ركز مع الاهلى الفترة دى بس...وسيبك من موضوع الاحتراف مؤقتا ...كل يوم بنسمع كلام جديد وده مش مخليك مركز..وبان اوى فى ماتش انجلترا.

 ***************************

مع العالمية

نعتذر لو الأخبار قديمه شويه

لظروف خارجه عن ارادتنا

ومن العدد القادم .. انتظروا تغطيه متميزه لاخبار الكره العالميه

الدورى الانجليزى:

أرسنال: لاعب الارسنال ارون رامسى تعرض لكسر فى الساق ..ودى نفس الاصابة اللى تعرض ليها زميله فى الفريق ادواردو داسيلفا من حوالى سنتين...وهيغيب لنهاية الموسم ده ويمكن السنة دى كلها...فريق غريب واصاباته كتيرة اوى اوى..فان بيرسى..جيبس..وغيرهم وغيرهم ...منظر الاصابة كان وحش اوى ياجماعة بجد

مانشستر يونايتد: واين رونى الفترة دى متألق معاهم بأداء ممتاز للغاية...دائما يقودهم للفوز..الفرق قل جدا دلوقتى بينه وبين تشيلسى نقطة واحدة...خلفه مباشرة ارسنال بفارق نقطين....ولسة المباريات القادمة صعبة على المان وتشيلسى عكس ارسنال ...لسة الدورى الانجليزى على قمة الدوريات من وجهة نظرى

تشيلسى: الفريق الفترة دى بيعانى من شوية مشاكل..خاصة مشكلة جون تيرى الشخصية...وكمان مشكلة اشلى كول انه مصاب وكمان عنده مشاكل شخصية برضو...اثرت على الفريق بالسلب واتهزم من مانشستر سيتى 4-2 على ارض تشيلسى (ستامفورد بريدج) وقرب منه منافسينه ارسنال ومانشستر يونايتد.....وحصلت اصابة لبيتر تشيك فى مباراة انتر ميلان فى دورى ابطال اوروبا وهو مصاب لمدة شهر...والحارس الثانى هيلاريو للاسف مش على المستوى المطلوب..ربنا يستر عليهم لان ملاحقينه مش هيرحموه

مانشستر سيتى: الفريق ده في نجوم كويسة جدا جدا ....بس برضو فى حاجة ناقصاه....عملو مباريات حلوة الفترة اللى فاتت.....خاصة انهم فازو على تشيلسى 4-2 فى الستامفورد بريدجّ!!..نتيجة كبيرة اوى على تشيلسى...حاليا هو 49 نقطة وفى المركز الخامس بالتساوى مع توتنهام هوتسبير...وهداف الفريق هو كارلوس تيفيز نجم مانشستر السابق....اللى بعتبر بجد من خسائر المان يونايتد الفترة اللى فاتت

الدورى الاسبانى:

ريال مدريد: الحقيقة يا جماعة انا الريال بعد كل النجوم دى ادائه برضو مش عاجبنى ...مش ده الريال اللى الواحد متعود عليه...فى حاجة غلط فى الفريق...عندنا النهاردة اخبار عن الفريق...اولها اصابة المدافع البرازيلى (بيبه) ويقال انه مش هيعرف يلحق كاس العالم كمان...وفى كمان خبر بيقول ان راءول فى طريقه لمغادرة الفريق ويقال انه رايح فريق امريكى ....هداف الفريق حاليا هو هيجوين برصيد 16 هدف...وكان اخر لقاء حصل ليهم مع تنيرفى وانتهى بفوز الريال 5-1 ...ريال مدريد عنده دلوقتى 59 نقطة بفارق نقطيتن عن برشلونة....المنافسة قوية جدا دلوقتى عشان الريال عاوز يتصدر الدورى ومنتظر اي هزيمة لبرشلونة عشان يتربع على الدورى ويسيطر عليه.

برشلونة: برشلونة دلوقتى بيواجه مشكلة كبيرة جدا جدا ...هى المدافعين...فى اصابات فى دفاع البارسا وظاهر جدا جدا الفترة دى ...بس بدأو يرجعو بالتدريج دلوقتى ..برشلونة متصدر الدورى دلوقتى برصيد 61 نقطة بفارق نقطين عن ريال مدريد اللى عنده 59 نقطة ..هداف الفريق حاليا هو ليونيل ميسى برصيد 17 هدف..واخر مباراة فاز بيها برشلونة كانت على ملجا 2-1 ...برشلونة دلوقتى بيحاول انه يحافظ على تفوقه ويفوز فى المبارايات الجاية عشان ريال مدريد بينتظر اي غلطة ليه عشان يتصدر الدورى

فالنسيا: الفريق ده انا من وجهة نظرى مظلوم اعلاميا...بيقدم كورة جميلة جدا جدا عنده نجمين مميزين اوى وهما دافيد فيا..وديفيد سيلفا...هو حاليا الثالث فى الدورى ....وهداف الفريق هو ديفيد فيا برصيد 17 هدف ...والفريق عنده 49 نقطة وبيحاول يحافظ على المركز ده عشان يقدر يدخل دورى ابطال اوروبا

الدورى الايطالى:

انتر ميلان: هو متصدر الدورى الايطالى حاليا برصيد58 نقطة ...وهو الحاصل على الدورى الايطالى السنة الماضية برضو....الفريق اداءه السنادى متميز جدا جدا ...ابرز لاعبى الفريق حاليا هو شنايدر لاعب ريال مدريد السابق...هو لاعب خط وسط متميز جدا ...هداف الفريق حاليا هو ديجو ميلتو برصيد15 هدف ...الفريق بيعانى حاليا من مشاكل كبيرة جدا فى خط الدفاع...الدفاع كله يعتبر مصاب...وفى مباراة لعبوها من غير مدافعين تخيلو؟؟؟....الدفاع بدء حاليا يرجع بالتدريج ..مدرب الفريق ده هو جوزيه مورينهو الذى يلقب بالثعلب...

اي سى ميلان: هو حاليا المركز الثانى فى الدورى برصيد 54 نقطة...ومتصدر قائمة الهدافين فيه حاليا هو اللاعب البرازيلى الكسندر باتو برصيد 12 هدف...بيضم فى صفوفه اللاعب رونالدينهو وهو حاليا من وجهة نظرى فى تألق مستمر ...وبيحاول الفريق انه يتصدر الدورى لان الفارق بينه وبين انتر ميلان 4 نقاط فقط ..

روما: حاليا هو الثالث فى ترتيب الدورى الايطالى برصيد 51 نقطة بفارق 3 نقاط عن الثانى وبفارق 7 نقاط عن المركز الاول....هداف الفريق هو فرانشيسكو توتى برصيد 10 اهداف...بيضم في فريقه لاعبين جيدين امثال لوكا تونى لاعب بايرن ميونخ السابق...وبيحاول انه ينافس على الدورى برضو لان الفرق مش كبير بينه وبين الاول والثانى ..

الدورى الالمانى :

بايرن ميونخ: الفريق حاليا بيمر بمرحلة صعبة ف حياته...حاليا هو المركز الاول فى البوندسليجا برصيد 53 نقطة ..ف اخر مباراة تعادل مع فريق كولن 1-1 ..هداف الفريق هو ماريو جوميز برصيد 10 اهداف ..بيحاول يحافظ على تصدره للدورى ولكن الفرق اللى وراه فى الترتيب فى سباق مستمر للحصول على اللقب....

شالكه: الفريق ده فى المركز الثانى حاليا برصيد 51 نقطة خلف البايرن مباشرة ...اخر مباراه ليه فاز 4-1 على اينتراخت فرانكفورت...هداف الفريق حاليا هو كيفن كورانى برصيد 12 هدف...بيحاول بقدر الامكان اللحاق بالبايرن والحقيقة الدورى متوهج الفترة دى لان الفارق بين الاول والخامس مش مكمل 10 نقاط

بايرن ليفركوزن: حاليا هو فى المركز الثالث برصيد 50 نقطة بفارق 3 نقاط عن المتصدر البايرن وبفارق نقطة واحدة عن الثانى وهو شالكة....متصدر الهدافين فى الفريق هو ستيفان كيسلنينج برصيد 13 هدف ..

هامبورج:الرابع فى الترتيب حاليا....عنده 43 نقطة ...اخر مباراه خاضها فاز 1-0 على هيرتا برلين...هداف الفريق حاليا هو  ملادن بيترتش برصيد 6 اهداف فقط

بروسيا دورتموند: فريق اللاعب المصرى محمد زيدان....فريق بيتقدم بخطوات ثابته الى حد ما مع بطئ ملحوظ ...ترتبيه الخامس برصيد 42 نقطة ..اخر مباراه خاضها الفريق كانت ضد بروسيا مونشنجلادباخ بنتيجة 3-0 احرز منهم اللاعب المصرى محمد زيدان هدفان ولا اروع ...متصدر الهدافين حاليا فى الفريق هو لوكاس باريوس برصيد 11 هدف...يليه محمد زيدان برصيد 5 أهداف فقط...مع العلم ان محمد زيدان بيصنع كثير من الاهداف للفريق...